男人唔迫得

話說花園有一塊非常雞肋嘅草地，我一早就想叫射巴搵業主整走佢舖地磚，多個地方招呼朋友又好種野又好。但射巴就硬係要留番塊草地，話令佢好放鬆喎。我心諗，塊草皮日久失修，已經生哂雜草甩皮甩骨，仲有貓屎狗屎垃圾喺上面，你竟然話佢令你relax?! 我就話: ”一人退一步，你要草地，得！你負責保養，企企理理，我無所謂。” 開頭佢心不甘情不願仲駁咀話佢唔介意個草地咁核突，想乜都唔搞。然後我掉低一句:”我有份交租，有份要求屋企乾乾淨淨。” 佢思考良久，認為我都有道理，第二日就走去買種子同泥，重新舖好個草地喇！開頭佢都hea hea地，打算整一半就算。我心入面係覺得un眼，但佢肯郁手就算啦係咪？點知佢愈搞，要求就愈高！事隔一星期，佢今朝好早起身，將已經舖左但舖得差嘅草皮又重新再做過。嗯，男人果然唔迫得。隻眼開隻眼閉最好。。。