男人唔迫得

話說花園有一塊非常雞肋嘅草地,我一早就想叫射巴搵業主整走佢舖地磚,多個地方招呼朋友又好種野又好。但射巴就硬係要留番塊草地,話令佢好放鬆喎。🙄 我心諗,塊草皮日久失修,已經生哂雜草甩皮甩骨,仲有貓屎狗屎垃圾喺上面,你竟然話佢令你relax?! 我就話: ”一人退一步,你要草地,得!你負責保養,企企理理,我無所謂。” 開頭佢心不甘情不願仲駁咀話佢唔介意個草地咁核突,想乜都唔搞。然後我掉低一句:”我有份交租,有份要求屋企乾乾淨淨。😤” 佢思考良久,認為我都有道理,第二日就走去買種子同泥,重新舖好個草地喇!開頭佢都hea hea地,打算整一半就算。我心入面係覺得un眼,但佢肯郁手就算啦係咪?點知佢愈搞,要求就愈高!事隔一星期,佢今朝好早起身,將已經舖左但舖得差嘅草皮又重新再做過。嗯,男人果然唔迫得。隻眼開隻眼閉最好。。。😂

《後記》

射巴喺泥度掘到7瑞郎,事實證明,聽老婆話會發達。LOL

#瑞士#雲妮莎瑞士日常#瑞士生活#射巴一定係明白左happywifehappylife呢個道理

瑞士的賞花季節

記得兩年前在網上得悉瑞士也有櫻花盛開的地方,遲遲未等到好天氣去拜訪,等著等著,花季就完了。如果兩年前有看過我的影片,你可能會記得我有在這個地方拍過淍零的櫻花。 今年我狠狠的告訴射巴:「櫻花開了,我一定一定一定要拍到!」能親眼欣賞到滿滿的櫻花,心裡覺得滿足。

過去兩年,經歷很多,從遊舊地有著不能言喻的感動。一直在這個陌生的國家拼命的努力著,下一次再來,我也許又再進步了吧。

一個女車神嘅誕生

還記得17歲那年,老媽子叫我趕快考車牌,好讓老人家們出街食飯有司機開車,可以安心暢飲。我家住邊境地區,特別多貨櫃車出入。每天坐老媽子的車出入看見路況都嚇到怕怕,遲遲不願學車。

直到移民後,沒有車牌是非常不便。於是在射巴的威迫下,還是開始了P牌生涯。在瑞士考車牌一點也不容易,而且花費非常昂貴。如果你將會移民到瑞士,而你又有香港車牌,那請你記得來瑞一年內一定要做車牌轉換。你只需要考路試便可以換取瑞士車牌,若逾期便要從頭考,浪費不少精神心機。

瑞士考車牌有多煩?讓我來告訴你。

驗眼

考牌第一步先要驗眼。學神需要自行找視光師驗眼並取得一張視力證明。盛惠10-15瑞郎。

急救課程

驗完眼,仍未能夠坐上駕駛座學車。學神先要上一天半的急救課程。課程中會學到基本安全知識,心外壓,如何正確使用心藏除顫器等急救知識,盛惠150瑞郎。

筆試

完成急救課程後,便可以進行筆試。筆試以選擇題形式進行,考生需於45分鐘內,150條選擇題中答對至少135題。當年我買了電子版試題,不停重複又重複做,輕鬆過關。盛惠30-40瑞郎。

道路意識課程

領取學神牌之前,仍要多花兩晚共8小時上道路意識課程。導師會講解車的結構,如何調較行車鏡,座位高度,檢查車軚,引擎機油等等,亦會深入講解路權,路況評估等知識。盛惠250瑞郎。

道路實戰

過五關斬六將終於可以拿到學神牌,坐上駕駛座開車了!在瑞士,學神並不一定要全程跟師傅學車。學神練習期間只須有一位牌齡滿三年的經驗駕駛者在旁指導便可。雲妮莎因為對車零認知,而且學的是棍波車,因此一開始便是跟師傅學。師傅每小時盛惠約100瑞郎。期間射巴並沒有跟我一起練車,所以我拖了兩年共花約40小時即4000瑞郎學費才考路試。學神需要於發牌後兩年考路試,否則需要從頭再來。

路試

路試約45-50分鐘,學神需照考官指示駕駛到不同路段。盛惠約120瑞郎。雲妮莎不才,考了三次才合格。若考生三次都不合格,則需要見道路心理學家作心理評估分析證明考生有足夠能力應付路況。還好我第三次過了。。。

三年試用期

以為車牌到手便可以世界通行?車牌到手頭三年不可以犯錯,嚴重超速,醉駕當然會吊銷牌照,從頭再考。不過任何情況下,都不應該危駕醉駕藥駕吧。。。

L2課程

L2練習車場

2020年前考獲的車牌,需於3年內完成L2課程,而由2020年開始,考生需於車牌到手一年內完成。此課程為期一天,學員會於特設的車場中嘗試各種危險路況。導師會指示學員於安全情況下做一些危險的駕車示範。例如於濕滑路面以高速過彎,急剎等。射巴說那是人生中唯一可以體驗飄移的一天。另外,導師亦會講解危駕的後果及如何有效地慳油。這一天對於年輕駕駛者來說非常有警剔性。自2005年推出課程起,瑞士的交通意外數字有明顯下降。當天跟我一起上課的年輕人更說到課程提醒他們道路安全的重要性,因為倘若不幸地有意外發生,受影響的不只是自己,還可能影響一整個家庭。此課程盛惠360瑞郎。

由零考一個車牌,洗費約2000-5000瑞郎不等,視乎你有多熟練。 今年五月,我便完成三年試用期,將會獲得永久牌照。真的很開心,回想當年恐懼開棍波車,因害怕而流過不知道多少公升的眼淚,更曾一度以為自己要轉考自動波。。。種種經歷都成就今日的女車神。我不是道路炸彈,我是一位安全第一卻不婆媽的駕駛者。我為自己感到驕傲。

歐式踫瓷

話說我同射巴兩架車前後位泊喺屋企門前,我喺前面,佢喺後面。有日出門口上佢車,佢輕描淡寫咁問我:「你早幾日泊車係咪唔小心hi到我架車?我左邊車頭花左。你睇,你車尾有白色油痕,應該係。」我心諗,無理由架,我泊車不嬲都好小心,點會hi到你架車仲要唔知?然後我再諗,我泊車要hi到你架車,照道理都係hi你右邊車頭,點會hi到左邊呢?(左邊係牆)我解釋完,佢就心虛同我講,其實係佢上個星期泊車hi到我架車。Well,原來瑞士人都興踫瓷。

好明顯,架車有幾多泊車雷達,倒後鏡頭,自動泊車系統都無用。個司機都亂黎嘅!

執漂流木日常

話說有日我忽發奇想,想用漂流木製作一個高一米半嘅掛架用黎掛植物。於是我同射巴走去湖邊執木。第一支執到嘅木係約兩米高好靚好滑,形狀非常適合做架嘅主幹。因有一定重量,射巴叫我先放低,回程再拎,反正爛木無人會要。點知30分鐘後,我地番到原點,舊木已經俾人拎走左。🙃 所以話,有啲野,係你就係你,唔係你嘅都不必強求。

然後我再搵,反而執到其他大小比較合適嘅木,只需要將佢地組合一起就好。然後今日我地又再出去尋找木塊做底座支撐。底座部分就搵唔到,反而搵到舊大嘅,可以做桌面裝飾。 沿途捧住舊木,引來不少途人搭訕,大家都稱讚舊木係正野,又問喺邊頭執到寶咁好。😂

後尾射巴同我講,佢開頭以為只有我呢啲傻人先會去執爛木,點知原來係好野!🙄 雞湯講一句,你知唔知你自己有好多特質,你以為係”爛木”,但喺別人眼中係寶?❤️ 等我執齊架生,啲木又乾透,我就拍個片紀錄下整木日常!💪🏼

過完年好relax好zen,年初一條片希望正月內出到。😂🤪

2021年我的其中一個突破

Click入圖片即可傳送到新聞連結

5年間斷斷續續有不同媒體嘗試接觸進行有關瑞士的訪問,我都一推再推。你話我好多人識咩?唔係。喺瑞士年資好多咩?唔係。認識瑞士好深咩?唔係。咁點解會訪問你?大概係因為瑞士嘅香港人都十分低調,好少會有人好似我咁日日走出黎閒談瑞士文化同瑞士生活。老實講,對於瑞士文化日常呢一個話題我毫無信心,因為文筆比我好,認識比我深嘅在瑞作者大有人在,我實在諗唔到自己有咩可以拋書包。

咁點解今次決定走出黎接受訪問?

2020年我喺瑞士經歷左一個大心理關口,我發現自己將別人對自己嘅睇法睇得太重。我怕人地話我港女食洋腸,港女呢樣港女嗰樣。所以我所有野都做一半低低調調,來一個歲月靜好。後來有朋友嘅一句「你做得社交平台就係想人知道你嘅存在,點解要做到咁閃縮?有少少矛盾噃!」呢一句說話點醒左我,所以我決定行出黎,分享多啲唔同嘅嘢俾人。或許有那麼一個同樣身在異鄉,感同身受嘅人睇到,得到一絲安慰,知道自己係可以嘅,咁就夠啦。

真係非常感謝Yahoo 新聞編輯嘅邀請,係一次非常愉快嘅合作!

現在雲妮莎正同神秘人溝通中,黎緊會做關於心理學嘅Live。請留意往後嘅公佈!

記住路係自己揀架,就算仆街都記得你有華麗轉身嘅權利

由於全球化的關係,近年基於異國婚姻而往外地居住的香港人愈來愈多。少數幸運的能在當地繼續做自己在香港辛苦打拼多年的事業,但大多數都無奈轉行轉型。縱使轉型成功,工作又沒有必然保証前景順利。畢竟人在異鄉,頭十年遇到的事情大概也只能見步行步。

叫得上見步行步,自然沒有太多空間選擇,慢慢地,便會變成遷就,再而變為屈就。屈就久了,便會怨。怨另一半不夠自己勇敢,走出舒適圈。「導致」你今時今日人在異地無人無物,淒涼都不敢打電話回娘家訴苦水。Blah blah blah就到這裡,相信同路人在異地住得三五年唔多唔少都會有感。

但是,這篇文章絕對不是要數嫁到這世界邊端的港女慘事。

適應異國生活並不是想像中簡單,三五七年少不免。在香港找工作都已經要過五關斬六將,更何況人在異鄉?無工作的期間一定要花時間增值自己,學一些自己喜歡的事情。情況許可的話,請不要屈就自己而做一些自己不喜歡的工作。把這一次的移民看待為你的第二人生,若要從頭再選一次職業,你想你的下半生做什麼?你想自己的人生有著什麼的意義?當然有些人對工作無感,只要有份朝九晚五準時收工便可以。那非常好,我也非常羨慕。我說這些並不是要所有人都行夢想主義,但若然你是一個完美主義者,我會請你用盡一切方法守住自己的界線。

在瑞士生活的五年間,我不斷在滿足別人的期望,可是到頭來我忽略了自己。我開始埋怨身邊的人。我把放棄夢想的責任全都推給射巴,實行來一個我過得不好你也別想好過。最後一個做了怨婦,另一個做了內疚男。後來一位朋友告訴我,「怨什麼呢?不都是你自己的選擇?怎麼把自己弄得像個受害者?」頓時茅塞頓開。

做任何事,你都有選擇,你都有能力去改變。問題在於你有無勇氣去面對。先找回自己的意義,自然可以擺脫受害者的角色。

#瑞士 #瑞士生活 #雲妮莎瑞士日常 #hkblogger #hkyoutuber

噢聖誕節托它歸家

聖誕樹Norman

2020年點衰都好,生活中總會有可以值得感恩嘅小確幸。瑞士雖然稅率高,生活費高,冬天仲會有季節性抑鬱,又悶。。。但係!!!能夠生活喺一個自由國家,出去求其影張相都係靚景,唔洗日日survival mode,真係要感恩再感恩!過去一年因為屋企無書房,而疫情關係我同射巴都WFH,於是屋企個廳就變左用黎辦工睇電視打機食飯。然後好慶幸喺今年咁多嘅不穩定情況下仍得到業主嘅offer(同舊屋同一個業主)可以搬到大啲嘅屋(隔離屋😆),租金仲比出面平好多好多。😭 對另一邊路仲清靜好多好多,搬左過黎後睡眠質素仲提升左。

於是乎今年聖誕雖然無乜氣氛,但我地仍決定要迎接歴年最大棵嘅聖誕樹Norman(對,我地屋企幾乎所有有生命嘅野都有名🤭)!真聖誕樹喺歐洲其實唔算十分貴。Norman大概2米高,價值60瑞郎(HKD520)左右,我覺得好合理。之不過佢個底座就要50瑞郎(HKD430),有少少妹仔大過主人婆嘅感覺。😂

今日瑞士聯邦政府又話建議星期六開始所有餐廳需於七點關門,限聚令收緊至5人。但最終仍要等待星期五同省政府商討後才可以確定詳情。政府想保住經濟,於過去一年面對疫情一直任由省政府各自為政,就有如火頭不停”辣”,呢頭淋熄嗰頭又著。。。🤦🏻‍♀️再咁落去小商户真係會頂唔順。最近又話有疫苗,但大部分瑞士人都唔願意接種。縱觀社交媒體上瑞士人認為疫苗安全性及有效性一般需要約十年觀察期。目前要求大眾接種新研發疫苗為太過倉卒。再者,病毒一直變種,有人擔心接種疫苗後,倘若身體產生抗藥性,後果得不償失。唔知大家今年聖誕如何苦中作樂?對疫情,疫苗又有咩睇法呢?

#雲妮莎瑞士日常#瑞士生活#瑞士