瑞士大學生的二三事

📌分組功課類

你以為讀Master就無free rider?錯哂!瑞士嘅公立大學讀Master學費平(580瑞郎/sem)又無特別收生要求(某些特定學科除外),有Bachelor學位就可以讀上去。由於得來太易,free rider特別多。有一次我地三人一組寫一份約二十頁報告。其中一位小姐以自己寫法文唔叻為由,失蹤左成個sem,到要交報告嗰日我whatsapp爆佢,問佢打算點。當時我講左一句you don’t give a shit,呢位小姐竟然可以惡人先告狀寫email同教授投訴,話我出言恐嚇。最後教授當然係怕怕扮無收到任何人嘅email,而嗰份功課拎A。🙄

📌畢業論文類

曾經有兩位學生分別前後腳畢業,早一個sem嗰位係高材生,論文滿分,仲被上載至大學網站供人查閱。誰知道下一個sem畢業嗰位學生抄襲左呢位師姐嘅論文又無被發現。最好笑係佢地兩個嘅supervisors係一樣。同埋大學最忌抄襲,有專門嘅防抄襲軟件,一scan就無所盾形。呢位師姐心有不甘向反抄襲部門投訴,結果一樣,無回覆。🤡

📌筆試類

有一次考統計學,由於需要用到統計學軟件,所以答題會用自己電腦。於是有一班同學自製whatsapp group喺電腦分享成段電腦指令,抄答案,容易啦!不過當時我心諗,遇著堆syntax係錯嘅咁咪攬炒?我都係信自己多啲。。。

瑞士考試係可以自攜飲品同食物,只要你唔係帶成個煲仔飯入去,普通小食如朱古力,餅乾,水果都可以。一般黎講,考生一進場需要立即將所有電子儀器收好並將袋放喺主考席,考生唔可以帶筆袋,但可以帶帽。🤡派卷期間,考生不得翻閱試卷是常識吧?講就咁講,但佢地會一收到就開卷自己喺度做然後無人出聲制止。成個場四百幾人,唔知最尾收到卷嗰條友作答時間蝕幾多呢。。。

最嚴重嘅問題在於廁所位。。。如果考試歷時四小時,除頭一小時同最尾10分鐘唔可以去廁所外,中間嘅時間都係無限任去。寫就話每次限一人,但監考嘅都係打份工嘅博士生,為左唔洗行好多轉,佢地會儲埋兩三個學生一齊帶。監考員理論上應該喺廁格外等候,但都係嗰句,打份工, who cares? 再者考生有無收埋紙,手機等等物品真係無得查。考生去廁所嗰條隊喺整整三個小時嘅考試入面無斷過。呢個情景媲美去clubbing排隊入場條隊。

有啲人早做完卷會早走,佢地唔知點解硬係要同佢地啲好朋友打眼色送飛吻先肯走,好想一巴星埋去,再一野車佢個袋埋去叫佢滾出去。

收卷嘅時候時常會發生一個情況,就係總有人死都唔肯停筆。你埋去收卷,佢死都要寫,你仁慈俾多5秒佢,佢仲寫緊。佢同我講,你俾我寫埋佢啦,我最尾嗰段總結寫左喺草稿紙,未抄番落卷啊!!!我話,not my problem,然後一手搶走佢份卷。佢後面位朋友更好笑,佢話,我未寫名啊!我又話,not my problem either。收完卷,呢兩個人走去我旁邊另一位整理緊試卷嘅同事度,苦苦哀求要寫番指示話答案喺草稿紙。呢位同事咁啱就係改佢卷嗰位助教,佢怕佢煩,又可憐佢壓力大,所以搵番佢份卷出黎俾佢改。OK,我做左天底下最PK嘅監考員。

呢堆行為喺香港嘅大學應該早就俾人零分重作。廿幾歲人考試連時間管理都唔識,憑咩要特權?我真係唔明。Anyways,到最後我調整自己心態,打份工,who cares?

有人留言估性感衣著,我可以話你知,好多野睇。😏

又不過!!!我都有認識好多讀書好認真嘅學霸!只係有一堆唔認真對待考試嘅人恃住無王管而肆無忌憚。

#雲妮莎瑞士日常#瑞士

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s